Benquerido amigo...
...vai xa para dez anos —como pasa o tempo!— en que nunha mañá fría de febreiro as voces uniformes do orfeón ribadense acompañadas polo son dunha harmónica triste nos informaban ós alí presentes de que había un lugar alén do mar... parece que aínda as estou a ouvir. Como pasa o tempo, repito. Porque neste treito de dez anos algúns dos que alí estábamos para che dicir adeus teñen tamén embarcado no bote negro do barqueiro Caronte para se reunir contigo nese lugar, alén do mar, onde seguramente Daniel e máis ti seguiredes a manter as eternas conversas practicadas nas vosas cotiás camiñadas de cada mediodía.
Mais aqueles ós que aínda o barqueiro do Hades nos concede ficar provisoriamente nesta terreal ribeira non queremos deixar pasar a data deste décimo cabodano sen facer uso dela para nos demostrar que o tempo é so unha falacia escrita polas agullas dos reloxos nas follas dos almanaques, pero que non ten cabida na lembranza dos que tivemos o grande privilexio de ter desfrutado da túa compaña, da túa conversa, da túa humildade, do teu exemplo de honestidade e da túa palabra de amigo.
Por iso, —malia que saibamos que ti non es moito destas cousas—, aínda sen a túa licenza ímonos tomar a liberdade —confío que nos saibas desculpar o atrevemento— de nos xuntar para te compartir en espírito presidindo esta exposición testemuñal das pezas que para a ocasión brindaron aqueles dos teus amigos que se distinguen como máis habilidosos no eido da arte. Pode que non estean todos os que son e que, talvez involuntariamente, alguén puidera quedar esquecido, pero ben sei que dende onde te achas entendes que cando as cousas se fan con certo apresuramento e con máis vontade que medios estas cousas poden pasar e ninguén se debe ter por ofendido.
No nome dos artistas que coas súas obras enchen as seguintes follas e de todos os que te mantemos vivo na nosa lembranza, recibe dende esta ribeira da vida unha forte aperta, benquerido amigo.
Manuel López. Febreiro de 2015
(Limiar do catálogo da exposición colectiva levada a cabo na memoria de Suso Peña con motivo do décimo cabodano do seu falecemento)
